|
Rojav.net
Mihemed Brîmko/ Hewlêr: Roja çarşemê li Pirtûkxaneya navendî ya
zanîngeha Selehedînê li Hewlêra paytext, sêyemîn pêşengeha pirtûkan
vebû.
Pêşengeh bi beşdarbûna (75) dezgehên (Kurdî, Erebî, Ingilîzî) ji
welatên (Libnan, Misir, Urdin, Sûrîya, Îmarat, Erebistana Sûdî,
Birîtanîya, Hind û Tirkîya û welatên din..) pêkhatîye û ev pêşengeh
bi alîkarîya Giropa (HANA) ya Ragihandinê û Dezgeha (Dicla) ya
Urdinî bo belavkirin û dabeşkirinê hatîye li darxistin, herwiha
bêtirî (10000) navnîşanên pirtûkan û (5000) CD di vê pêşengehê de
hatine pêşkêşkirin.
Di seredaneke pêşengehê de me hevdîtinek li gel "Dr.Mihemed Mistefa"
Emîndarê Pirtûkxaneya Navendî li Hewlêrê pêkanî û birêz di derbarê
vê pêşengehê de wiha got: "Ev Sêyemîn pêşengeha salane ye ku li
Pirtûkxaneya Navendî dihête li darxistin, di vê pêşengehê de nêzîkî
75 dezgehên cîhanî beşdar bûne û 10 hezar navnîşanên pirtûkan hatine
pêşkêşkirin û bêtirên pirtûkan taybet in bi warên; zanist, edeb,
bijîşkî, dermansazî û gelek warên din û tiştê balkêş di vê pêşengehê
de pirtûkên di warê kompyûter de ne "
Herwiha pirofîsor "Sebah Ehmed Necar" pisporê Derûnasîya Civakî li
Kolêca Zanistî Ramîyarî li Zanîngehê beşdarî li vê pêşengehê kiribû
û sebaret bi pêşengehê têbîn û pêşnîyazên xwe ji me re gotin: "Bi
giştî Kurdistan pêwîstî bi vî şêweyê ji pêşengehan e û em hêvîdar in
ku bibe karekî werzî, wate her sê heyvan carekê lê çend mercên me
hene em weke kesên Akadîmîk ku nirxa pirtûkan bi kêmanî 20 % kêmtir
be ji berku buhayê wan gelek giran e, lê sebaret bi pirtûkan bi
rastî her çendî ji alîyê şêwe de xweşik in lê weku min çend pirtûk
dîtine naveroka wan gelek kevin bûn û li salên heştêyan min xwendine
lê di çapkirina wan de salên 2003-2004 nivîsandine bêyî ku nîşan
bidin salên çapê yên kevin, mixabin dezgehek Urdinî bo belavkirinê
bi vî karî rabûye û ev jî weke xapandineke zanistî û akadîmî bo
lêkolîner dihête kirin û bi vî şêweyî dikarin pirtûkan bi nirxên
niha bifroşin"
Sebaret bi beşdarîya camewerî li pêşengehê (Dr.Sîrwa Es'ed) Pro. li
beşê Dîrok li kolêca Wêje (Edab) weko yek ji beşdaran wiha got: "Ev
cûre ji pêşengehan girîng e zû zû bihêtin li darxistin û ez pirtûkên
Erebî bi şêweyekî berçav li vir dibînim ji yên din bêtir, divê ewên
van pêşengehan li dardixin bizanibin ku nifşekî me peydabûye bêtir
bi Kurdî bi başî zanin ji ber ku piştî raperîna Kurdistanê li vê
derê (Raperîna başûrî Kurdistanê sala 1991) zimanê Erebî nemaye û ew
nifş di zimanê Erebî de lawaz e û erkên dezgehên me yên Kurdî yên
belavkirin û çapkirinê pirtûkên baş hilbjêrin û wergerînin bi Kurdî
û sebaret bi beşdarîya xwendekaran li pêşengehê mixabin ez
xwendekaran tek tek û kêm dibînim her çiqas nirxên pirtûkan giran e
lê divê xwendekar werin bi kêmanî navnîşana bibînin û herwiha
beşdarîya mamosteyan jî kêm e û ez hêvîdar im zanîngeh hin pirtûkên
baş hilbijêr e û ji bo pirtûkxanwyên kolêcan bikr e ji bo xwendekar
sûd jê bigrin"
Haja Se'îd Yihya yek ji beşdaran bû û têbîniyên xwe li ser pêşengehê
wiha gotin: "Wek em zanin û li gor pêşengehên berê û yên li salên
bûrî, beşdarîya dezgehên belavkirinê bêtir bû herwiha hejmara
pirtûkan jî bêtirbûn, lê vê carê çima kêm in ez nizanim, lê tevî wê
pirtûkên di warê kompyûter de vê carê hene û ev jî tiştekî baş e, lê
beşdarî jî kêm e, gelo roja yekemîn e lewre kêm e ? berê beşdarî
bêtir" herwiha (Hoşî Murad) xwendekarê kolêca Zanistî Ramyarî li
Zanîngeha Selehedîn yek ji beşdaran bû wiha got: "Bi rastî her weku
pêşengehên berê min çend pirtûk ji vê pêşengehê jî kirîn, lê mixabin
nirxa pirtûkan gelek giran e û divê çareyek jê re bihête dîtin ji
ber ku em wek xwendekar bo me zehmet e em pirtûkên bi vê giranîyê
bikirin û tiştê balkêş li pêşengehê ew bû ku pirtûkên herî pir yên
kultûr û çandê, ne tenê Erebî lê yê Erebkirinê bû û divê kesên
serpereştyar li vê dîyardeyê agahdarbin daku bandorên nebaş li
nifşên nuh nebin"
Li koşeyekê ji pêşengehê û di beşê kombyûter û têknolocîya endezyar
(Şêrzad Omer) berpirsê wê koşeyê û endamê nivîsgeha Mîlo ser bi
giropa HANA ve bo me wiha got: "Ev cara yekem e em li pêşengehê di
warê kompyûter û têknolocî de beşdar dibin û bi rastî xelkek zor li
vî beşî beşdar dibin û pêwîstîyên xwe yên kûmpyoter dikrin û bi
taybet CD yên pirograman û di rojên din de li gor daxwazên xelkê ezê
dê tiştan bêtir bînim û em bi 5 hezar CD yên pirograman û fêrkirinê
beşdarbûne û herwiha tishtên pêwîst ji kompyoteran re û kompyûterên
Laptop"
Herwiha jimêryarê u pereyên pirtûkan werdigire sebaret bi firoştina
pirtûkan li pêşengehê got: "Asta firotina pirtûkan asteke baş e û
xelk gelek beşdar dibe û bi taybet pirtûkên Zanistî û Bijîşkî û li
gor pêşengehên berê li vê pêşengehê firoştin bêtir e"
Dr.Sebah El-Zubeydî Rêvebirê Dezgeha Dîcle ya belavkirinê li Urdin
bo me bi zimanê Erebî wiha got: "Ev çend car in em li Hewlêrê
pêşengehên wisa li baweşa zanîngeha Selehedîn li dardixin û em
dizanin ku ev beşdarîya baş ji bajarê Hewlêrê heye, ji ber vê yekê
em agahdarbûn ku em pêşengehê di asta beşdarîyê de bikin û ev roja
yekemîn e hejmarek baş ji pirtûkan hatîye firotin û ez bawer im
nêzîkî 20 % ji pirtûkên pêşengehê hatine firotin"
|
