Kurdên êzîdî li gundên Girizêr û Sîba Şêx Xidir, girêdayî herêma Şingalê li Başûrê Kurdistanê, roja sêşemê, 14.08.2007 bûn armanca êrîşeke terorîstî. Di encama vê êrîşa hovane de, dora 500 şehîd û bi sedan birîndar ku piraniya wan zarok û jin in, bûn qurbanî. Ev êrîşa hov, di serdema nû de, mezintirîn tevkujiya xelkê êzîdî ye ku dikare bi fermana 73 bi nav bibe.

Ev êrîşa li ser kurdên êzîdî li Şingalê, di koçbereke dîrokî, di çarenûsa gelê kurd li Başûrê Kurdistanê de rû dide. Di vê koçberê de ku gerek e li ser xala 140 bê dengdan û ew herêmên li derveyî desthilatiya Kurdistanê mane vegerin nav sînorê Kurdistanê, hêzên terorê yên hov dixwazin kurdan bitirsînin da ku vê xalê erênekin yan jî koç bikin û herêmê ji kurdan vala bikin.

Em Hevgirtina Rewşenbîrên Rojavayê Kurdistanê HRRK vê êrîşa hov li ser kurdên êzîdî şermezar û riswa dikin, serxweşiyê bo xizm û malbatên şehîdan û saxiyê bo birîndaran dixwazin. HRRK ji desthilatiya Herêma Kurdistanê dixwazin ku bi awayekî lezgîn gelê kurd li herêmên Şingal, Xaniqîn, Kerkûk û cihên din yên derî sînorên Kurdistanê mane biparêze da ku tevkujiya kurdan ku bi destê terora reş û piştigiriya hêzên herêmê birêve diçe rawestîne.

Kurdên êzîdî îro bûne armanca tevkujiyeke hovane, li hember vê fermanê yekîtiya gelê kurd li herçar perçeyên Kurdistan û li derve tê xwestin da ku rê li ber fermana 73 li ser êzîdiyan bê girtin.

Dilovaniya Xwedê li ser şehîdên Şingalê û hemî şehîdên gelê kurd be!
Mirin û riswa bo teroristên hov, dijminên jiyan û mirovahiyê!


Hevgirtina Rewşenbîrên Rojavayê Kurdistanê HRRK