|
Axa kuştiyan bixepêrin
Ji bo kurdistana Hoşeng Broka ya hovane
Xelat Ehmed
Çipeçipa kurma ye di lula lingê min de, di qurmê
zimanê min de geza marekî.
Bi tilîne kiritandî tariyê didim alî, guhên min
tije ax, xirexira tûpişkan di qoqê min de.
bi çavine zîq li hêviya ronahiya bextê we, wext
navê min di heriya salan de dide jibîr kirin, di
bêdengiya we ya giran de ax min dimije û giyanê
min yê şepirze di kela xwe de noqî mirina
xemsariya we dibe.
Di kolanên Dêrikê de bê kes û bê xudan bihna
zarokên xwe dişopînim.
Wisa kuştî “ Xezalê “ ji ziyareta Dêrikê li
bextê min dide. Kuştiya parêzerên namûsa kuştinê
û halahala nêraniya kor û har.
Hîn me çavên xwe ji zaroktiyê diferikandin,
Xezala pazdeh salî em û xwendin berdan û mêr kir.
Xweşktirîna me bû, nextê wê bû çiroka
dêrikiyan.
Galegala bextreşan, di şiyarbûna rojê de bi
destê birayê wê stuyê wê û zimanê xelkê birî.
(Xezala) direviya rojê, bi (Roj) giha, xwe da
bin milê wê yê di serjêkirinê de dilerizî, eniya
wê ya gindirî ramûsa, û vane di bextê me yê
bêdeng de li ber kuştina namûsa di nav mîzê de
bi (Lava_ Duha) pêrgî xudayê bê ol û bê nav
dibin.
Civata kurdî bi tevahî hevbeşî kuştina xatunên
kurdan e, hevbeşî qedexekirina evîn û xudê ne,
xudayê ku bi xwe evîn e.
Civata kurdî ya her pesnê xwe bi hurmeta jinên
xwe li ber miletên cîran dide, bila carekê li
xwe mukir were û bêje, hurmeta wan di çespandin
û şopandina rêz, sînor û hêza me de ye, gavek
derveyî derfetên me kuştina wan e.
Cendekên çend xatûnên kurdên “aştîxwaz” di bin
axa kurdistanê de dinalin bextê me.
Axa kuştiyan bixepêrin, tenê cezakirina kujeran
li ber dadgehan û şermezarkirna wan ji aliyê
civakê ve bextê me azad dike.
De ka meyzînin çawa namûsa we didin ber guleyan.
http://kurdistannet.org/vido/midyaplyer1.htm
|
