Ronakbîr û Lêkolînerê Ereb yê navdar Dr.Seyd El-Qeminî, di daxuyaniyekê de diyar kir, ku êdî ew nema dinivîsîne û her weha "Li hemû nerîn û boçûnên xwe yên berê poşman bûye". El-Qeminî yê ku 15 pirtûkên rexneyî li ser Tarîxa Islamê nivîsandiye, ji ber " Geflêdana grûpek terorîstî bi navê Cema El–Cîhad" ku berî demekê çend email jê re şandibûn û ew û malbata wî bi " Serjêkirinê" tehdîd kiribû, "Heger dev ji xebata xwe negere", biryara rawestandina karê xwe yê fikrî da.

El-Qeminî, her weha di daxuyaniya xwe de diyar dike, ku ewê ji îro û şûn ve wek "mirovekî normal bijî, û hemû bîr û boçûnên berê li pişt  xwe bihêle û baweriyê pê neyîne".

El-Qeminî di heman demê de, ragihand malpera lebral a ereb www.elaph.com, ku ew "Nema derdikeve ser ekranên Televizyonan û tu daxuyanî an jî hevpeyvînan nade alavên ragihandinê".

Hêjayî gotinê ye, ku Dr.Seyd El-Qeminî yek ji mezintirîn lêkolînerên ereb e, yên ku di van 30 salên dawî de li ser mijara ISLAMÊ wek Felsefe û Tarîx, rawestayî.Her weha li himberî saziya El-Ezherê jî disekinî û derbarê şîrovekirina çend pirsên girîng yên ola Islamê, bi taybetî jî têgeha El–Cîhad(Şerê pîroz), gelek caran nakokî di navbera wan de derketine. Her weha hijmarek pirtûkên El-Qeminî jî ji aliyê El-Ezherê ve hatine qedexekirin.

El-Qeminî di projeya xwe ya fikrî de, ku bi pirtûka"Pêxember Mûsa û Til El-Amarîne" bi dawî kir, bal dikişand ser xetera sîstema perwerdekirina zarok û ciwanan ya li welatên ereb û misilman, û diyar dikir, ku ev "Sîstem" bi xwe rê li vejîna tovên terorê li cem ciwanên ereb vedike.

Derbarê biryara El-Qeminî de, gelek gotar,nerîn,daxuyanî û goftûgo di çapemenya ereb de derketine. Hîna jî biryara El-Qeminî ya xwevekişandina ji beyava fikrî dengekî bilind di çapemeniya ereb de dide...

www.elaph.com