|
12ê xwîna şipiya
Hoşeng Broka
Îro,
roj, ku li binya Xetê ye;
Adar, ku li binya Xetê ye;
sal û demsal, ku li binya Xetê ne;
gulên zû,
û gavên zû, ku li binya Xetê ne,
dest dê li jêra Xetê, zû herin bin serê
goristanan.
Gav, dê nerme nerme, biniqutin sibehên li binya
wan, razayî.
Zarok, dê ji defter û qelemên xwe, biqetin, dê
xwe ji dibistanan vedizin, û qefil bi qefil,
bişêlihin bin baskên sirûd û stiranan.
Û kolan,
kolanên xwîna îna gonê;
kolanên xwîna şipiya,
îna şipiya,
nimêja şipiya;
kolanên li binya Xeta şipiya,
gund û bajarên şipiya
û şehîdên şipiya,
dê Adarê,
şipiya,
mûm bi mûm, bibin bêdengiya şipiya,
sirûda şipiya
û agirên şipiya.
Îro, 12ê Adarê ye,
dem Adar e,
cih Adar e,
û binya Xetê, li ser milên xwînên ku di mirinê
de hilnayên,
Adar e.
Ma Adar li jora Xetê jî, wek binya wê, şipiya ye?
Ma Adar li jor û hêlên din, yên Xetê jî, wek
binya wê, diçe xwînên şipiya, giriyê şipiya,
mirina şipiya û goristanên şipiya?
Îro, 12ê xwîna şipiya ye…
xwîn Adar e,
Hêêêêê de werne Adarê.
Îro 12ê agirê şipiya ye,
agir Adar e,
hêêêêê de werne Adarê
Îro, 12ê mrina şipiya ye…
mirin Adar e,
Hêêêêêê de werne Adarê...
hêêêêê de werne mirinê…
Çend xwînên din,
Adar û Adar,
hîn mirin hene?
Çend agirên din,
mirin û mirin,
hîn Kurd hene?
Û çend mirinên din,
Kurd û Kurd,
hîn Adar hene?
|
