|
Serokkomarê Iraqê Celal Talebanî
carek din hin daxuyaniyên ku nakevin xizmeta
netewa kurd da. Talebanî di axaftinek xwe ya vê
dawiyê de pesnê Iran û Tirkiyê û “siyaseta wan
ya mitewazin li himberî gelê kurd” da û ji
Tevgera Azadiya Kurdistanê xwest, ku “berê xwe
bide qada xwe û dev ji çekan berde û siyasetê
bike”!.
Talebanî her weha serkeftina AKPê jî pîroz kir û
da zanîn, ku ev serkeftin ji bo kurdan “şensekî
mezin e”.
Piştî van daxuyaniyan Endamê Buroya Siyasî ya
YNK Mele Bextiyar jî gotinên Talebanî di
hevdîtinekê bi (Kurd sat) ê re dubare kir û jê
wêdetir jî çû. Mele Bextiyar got, “PKK li
heremên me dimîne. Niha rêvebiryek heremî
damezandî ye. Bi dehan gundan girtiye dest xwe”.
Weha xuya bû, ku mesele bi rêk û pêk e. ji bo
şerê li dijî PKK konseptek heye. Ew herema ku
berpirsê YNK behs dike, ji bidehan gund pêk tê.
Hêzên PKK av û hemû xizmetkarî ji bo wan gundan
dewr kiriye. Ez bawer dikim eger niha
refrandomek di nava wan gundiyan de pêk bê, ka
gelo di bin vê idareya niha de bimînin an jî
tevlî idareya Silêmaniyê bibin, ewên biryara
mayînê bidin. Jixwe niha nexweşiya KOLERA li
heremên li jêr destê YNK belav bûye. Weha dixuye
ku derfetê dermankirina gel û xweparastina li
dijî vê nexwşiya tahlûke jî nîn in.
Mirov nizane gelo ev daxuyaniyên mam Celal
çuqasî dikevin ximeta kurdan. Mirov bi guman e.
Çima li AKPê doz nehat kirin ku agirbesta PKK
qebûl bike û li gel wê ji bo çareserkirina
pirsgrêka kurd, hevdîtinan pêk bîne?. Gelo çima
hêzên erebên Iraqê qebûl nakin ku rêxistina
“Hizbulaha” ya Lubnanê an jî “Hemasa” Filistînî
wek terrorist bên bi nav kirin. Lê Talebanî û
hin derdorên wî terorekirina kurdan qebûl dikin?..
Niha hikûmeta Iraqê biryarê dide ku refrandoma
Kerkûkê salekê paşve bixe. Rêveberiya başûr bê
deng e. Kesek devê xwe venake û gel bi rastiyê
agahdar nake. Gelo çi pîlan li dijî Kerkûkê tên
kirin?. Ew şandeya hikûmeta heremê ya ji bo
Washingtonê bi rê ketibû, çawa bû û encamên
hevdîtinên bi DYA ye re çi bûn?...
kes nizane û nikare bipirse jî…
Siyaseta nuxumandina rastiyan ya ku niha li
başûr rû dide gelekî tirsnak e. Ji dêvla bi hemû
hêza xwe ji bo Kerkûkê bixebitin, em dibînin
daxuyaniyan li dijî PKK û PJAKê hene. Gotinên
nêzî nêrîna Tirkiyê û Iranê û dij bi Tevgera
Kurdan tên gotin. Ev yek jî niha nakeve ximeta
kurdan û xizmeta bidestxistina Kerkûk û
parastina Xaneqîn û Şingalê…
Tiştê girîng û pêwîst niha yekîtiya kurdan e.
Dewleta tirk li dijî hebûna dewletek kurd li
başûr e. Ew dibêje em li dijî her cûreyê hebûnek
fermî ya kurdan in. Li bakur dibe li başûr dibe.
Li ku dibe bila bibe…
Erdoxan jî heya niha pêşwaziya Talebanî nekiriye.
Ew nabêje sedem ew e, ji ber ku Talebanî şerê
PKK ji dêvla artêşa me nake. Nexêr ne ew mesele
ye…
Ew dibêje “Talebanî serokeşîrek bakurê Iraqê ye”.
Ya rastî çavê wî bar nabe…
Pêwîste kurd moralê nedin siyaseta inkar û
imhayê ya dewleta tirkan. Pêwîste helwesta
Tevgera Azadiya Kurd qelis nekin û ya dijmin
xurt nekin…
Ji bo kurdan hebûn û hêza Tevgera Azadiya
Kurdistanê pêdiviyek stratîjîk e. Her wek çawa
ku Kerkûk û Şingal ji bo kurdan pirsa man û
nemanê ye, hêza Tevgera Azadiyê jî heman tişt e.
Di warê qezenca stratîjîk de hebûna her 4 hêzên
kurdan( PKK,PJAK,YNK,PDK) hebûna netewa kurd û
rihê berxwdan û jiyanê ye.
Dema birêz mam Celal dibêje bila PJAK û PKK li
başûr bibin penaber, wek hin hêzên rojhilat yên
klasîk, ew tê wateya qeliskirina kurdan li
himberî dijminên wan.
Ev hêz wek çawa ku li qada bakur û rojhilat
tekoşînek berfireh ya damezranidina berxwedan û
jiyanek bi rûmet dimeşînin. Ew di heman demê de
ji bo vegera Kerkûk û Şingalê jî şensekî mezin
in.
Ji bo têkilyên xwe yên bi Iranê û pêşxistina
“Hevbeniya kurd û şîyan” nayê qebûl kirin kesekî
mina mam Celal 2 hêzên netewa kurd bide ber
bazara bi Meleyên Iran û Sofîkên AKPê…
tariqhemo@hotmail.com
|
