»Xirabtirîn« wezaretê xirabtirîn destdirêjî li ser azadiya masmediyaya kurdî kir


STOCKHOLM, 10/8 2005 — Wezareta nêvxwe ya Kurdistanê (Hewlêr) duhî şefredaktorê rojnameya heftane Medyayê Ako Gerdî ji ber nûçeyeka nîvxelet û serastkirî bi qanûnên dema desthilata dîktatorê berê yê Iraqê Sedam Hisênî da girtin û biryara lêgerîna mala wî jî li sewcî û hakiman da derxistin. Wezareta nêvxwe ya Kurdistanê îdia dike ko rojnameya Medyayê ew »teşhîr« kiriye û navê wê bi xerabî derxistiye. Wezareta nêvxwe îdia dike ko destûra rojnameya Medya û Peymangeha Kurdistanê bo Pirsên Siyasî ji bo wê rapirsiya ko wan kiriye nebû.

Destpêka meseleyê wiha ye: Rojnameya Medyayê û Peymangeha Kurdistanê bo Pirsên Siyasî rapirsiyek li Silêmanî, Hewlêr û Dihokê li ser karûbarên herdu hikûmetan û wezaretên herdu hikûmetan kir û encamên wê di hejmara xwe ya 200-ê de belav kir. Li gor rapirsiyê beşdarên bajarê Hewlêrê wezareta nêvxwe (Hewlêr) wekî xirabtirîn wezaret destnîşan kirin û rewşa wezareta nêvxwe li nik beşdarên Dihokê jî ne gelekê baş e.

Rojnameya Medyayê di nûçeya xwe de nivîsî ko »wezareta nêvxwe li Hewlêr û Dihokê wekî xirabtirîn wezaret têne hesab kirin« û di nûçeyê de xeletiyek hebû ji ber li gor encamên rapirsiyê wezareta nêvxwe li Hewlêrê tenê wekî xirabtirîn wezaret e û li Dihokê wezareta ewqafê xirabtirîn e û halê wezareta nêvxwe jî ne baş e. Rojnameya Medyayê bêyî ko wezareta nêvxwe deng ji xwe derxe di hejmara xwe ya 201-ê de ev xeletiya xwe serast kir û ji xwendevanên xwe re got wezareta nêvxwe tenê li bajarê Hewlêrê xirabtirîn e.

Piştî ko rojnameya Medyayê xeletiya xwe serastkirî wezareta nêvxwe rabû û desthilata xwe bi awayekê xirab bi kar anî û polîs û sewcî û hakimên Kurdistanê hemî li bi hev re ajotin ser Ako Gerdiyê ko tîmsala rojnamevaniya azad û tîmsala rojnamevaniya dirist e.

Polîsan duhî tehqîqateka dûr û dirêj li ser Ako Gerdî û berpirsê Peymangeha Kurdistanê bo Pirsên Siyasî Mûsa Ehmedî kir û îfadeya wan girt û paşê jî biryara girtina wan hat dan û di heman demê de biryara lêgerîna mala Ako Gerdî jî hat dan.

Wezareta nêvxwe »qanûna uqûbatên iraqî« ya reqem 433 ya sala 1969-ê – ko di dema xwe de Sedam Hisênê dîktatorê berê yê Iraqê jî ew qanûn li hemberî mixalifên xwe bi kar aniye – êxist dewreyê û Ako Gerdî da girtin.

Ako Gerdî duhî di telefonê de dema ko girtî bû û li hêviya hatina hakimî bû ji Nefelê re got wezîrê nêvxwe Kerîm Sincarî bi xwe giliya rojnameya Medyayê kiriye û got ew endamê Sendîkaya Rojnamevanên Kurdistanê û cihanê ye û ev reftara wezareta nêvxwe jî destdirêjî ye li ser azadiya çapemeniya Kurdistanê.

Ako Gerdî û Mûsa Ehmed duhî dereng bi kefalet hatin berdan û dê paşê bêne mehkeme kirin.

Hinek desthilatdarên Kurdistanê kengê tu devê wan vekî dê behsa xirabiyên Sedam Hisênî û dema partiya be‘sê bikin lê belê heman desthilatdar dema ko bi dilê wan be xwe dispêrin qanûnên dema desthilata Sedam Hisênê dîktator û wan qanûnan ji xwe re bi kar tînin.

Gelo ew çi qanûn e ko ji bo xebereka serastkirî ya ko di eslê xwe de rast bû rê dide wezareta nêvxwe ko şefredaktorê rojnameyeka herî baş ya Kurdistanê Ako Gerdî bide girtin û mehkeme kirin?

Gelo ew çi qanûn e ko rê dide wezareta nêvxwe û polîs û hakimên Kurdistanê ko miameleya terorîstan digel şefredaktorê rojnameyeka herî baş ya Kurdistanê Ako Gerdî bikin û li mala wî teftîşê bikin? Ako Gerdî nûçe nivîsiye û ew aşkera belav kiriye û ma çi karê mala wî û zarokên wî bi wê heye? Hemî emrazên sûcê Ako Gerdî li cihê karê wî û di rojnameya wî de ne û ne li mala wî ne.

Kurd behsa medyaya azad û civata azad dikin. Ka medyaya azad? Kurdistan TV, Kurd-Sat, Zagros TV û rojnameya Xebat, Kurdistani Nwê û radyoyên Kurdistanê diviya ji duhî ve Kurdistan li wezareta nêvxwe kiriban cehenem û wisa bikirina ko wezîrê nêvxwe jî nezane xwe li kû veşêre û li helwêsta xwe poşman bibûya.

Hewlêriyan piştî çend karesat û teqînên terorîstan û Şêx Zanayî xirabtirîn poan da wezareta nêvxwe û aşkera kir ko wezaret karekê baş nake. Wezareta nêvxwe bi vê êrişa xwe ya li ser rojnameya Medyayê xirabtirîn tecribeya demokrasî û azadiya çapemeniyê jî nîşan da.

Heger fikrek yan nerazîbûneka wezareta nêvxwe hebûya bila ew wekî meqale yan daxuyanî ji rojnameya Medyayê re rêkira, neko desthilata xwe ya polîsiyer û hikûmî li hemberî rojameyê û şefredaktorê wê bi awayekê wiha xirab bi kar baniya.

Nivîskar: Nefel-Nûçe