|
Rêwîyo…
Çima bustek zemîn ne para te ye?
Çima cîhan tevde dijminê te ye?
Çima Ol û Mezheb bes xista te ye?
Rêwîyo…
Li Bakur Tirkê çiya ye
Li Başûr Israîla Duyemîn e
Li Rojhilat birayê Misilman e
Li cîhanê goka van û wan e
Rêwîyo…
Çiqas navên şeytên hene
Giş xistine para te
Çiqas hovîtîya wan heye
Giş vedigere ser te
Tevî ku tu bê şûr mertal î
Lê dîsa ew ditirsin ji te
Rêwîyo…
Carna tu bira yî
Lê biratîya pez û gur
Carna tu Kafir î, cihê te agir
Bi navê Xwedê
Çiqas car tu xapandin
Bi navê mirovatîyê
Çiqas car mirov ji te standin
Bi navê aşîtîyê
Lozan li Sîver guhertin
Şerê azadîya te rawestandin
Rêwîyo…
Ne her kes bi kurdî axifî
Ew Kurd e
Ne her kes bi navê Xwedê sond xwar
Ew bawermend e
Ne her kesî got :Welat
Ew welatparêz e
Ne her kesî got:Ax
Ew evîndar e
Lê tiştê herî cuda Rêwîyo
Pir zelal e
Tevî ku ne her kes dizane
Ji te re bêjim rêwîyo :
Ew ” hezkirina min û te ye”.
|
