STOCKHOLM, 9/6 2005 — Li gor rapisiyeka Nefelê piraniya kurdan yanî ji sedê 95-ê kurdan bawer dikin ko dewleta Sûriyeyê şêxê kurd Şêx Mihemed Meşûq Xeznewî kuşt. Nefelê berî pênc rojan pirsiyarek ji mêvanên xwe kir û rê da wan ko dengê xwe bidin.

Pirsiyara Nefelê wiha ye: “Li gor qenaeta te dewleta Sûriyeyê Şêx Mihemed Meşûq Xeznewî kuşt yan ne?”

Heta niho 532 kesan dengê xwe daye û ji wan 507 kesan gotiye ew bawer dikin ko dewleta Sûriyeyê Şêx Mihemed Meşûq Xeznewî kuşt û 25 kesan jî gotiye ew bawer nakin.

Mêvanên Nefelê nikarin her cara ko dikevin Nefelê gelek caran li ser hev dengê xwe bidin û ji ber hindê ev frekvenseka baş e û bi xetên giştî diyar dike ka kurd di heqê vê meseleyê de çawa difikirin.

Rapirsiyên di Internetê de divêt wekî rapirsiyên rûbirû û bi nav û îmza neyên hesibandin lê belê cardî jî têra xwe enformasyonê di heqê qenaeta kurdan de didin mirovî.

Rapirsiya Nefelê heta seet 23.59-ê îşev berdewam dike û paşê Nefel dê pirsiyareka dî ji xwendevanên kurd bike.
  

 

http://www.nefel.com/articles/article_detail.asp?RubricNr=1&ArticleNr=196