|
Ciwan Dêrikî
Navekî din li xwe nakim
her kes dinanên xwe li min qîç dike
awirên tûj û dijwar didine min
qalikên ser rûyê wan ketin ,
eşkere bûn çi hov in .
- - -
biratî
hem-olî
mirovahî
hemwelatî . . . .
bangdikim lê bi min dikenin . . .
ev çi gotinên qelew in ?
ev çi peyv û têgeh in ?
cihê şermê ne tev .
- - -
Rast e . . .
biratî heye . . ko ez ne kurd bim
mirovahî heye . . ko ez ne kurd bim
hemwelatî jî heye . . ko ez ne kurd bim
lê . . . heger ez kurd bim
ez ne misilman im ,
gawir im ,
nijadperst im ,
hevalbendê dijmin im ,
perçebûnxwaz im ,
terrorist im , û . . . hwd .
belê . . .
ew kesê malbata xwe napejirîne ,
xwe jê dişo ,
kirasê biyaniyan li xwe dike
kurd jê re dibêjin :
(berûya ji qalikê xwe der )
ez nabim ji qalikê xwe der
nabim xwefiroş ,
nijada xwe jî bi tu ol û baweriyan nadim ,
ezê bimînim kurd
û girêdayî deşt û zozanên xwe ,
serbilind im bi dîrok û kevnetora xwe ,
dimînim ser hişk
dibim terrorîst
û çi navî dixwazin bêjin bila bêjin
lê tu car navek din
li xwe nakim .
* * *
-------------------------------------------
KEWA DIL
Kewa dilê min dike bifire
Xwe bighîne hêlîna piçûk ,
lê nikare . . .
kewa min çengo kiriye . .
hêlîn jî sênc kiriye . .
dorpêç kiriye . . .
dinalim û dikalim
lê naghêm . . .
nikarim bêhnekî ,
hêlmekî azadiyê hilkişînim . . .
* * *
kar û kêferatê dikim
dem min tajo
na
ez demê tajom ,
sirûda jiyanê lêdixim ,
ez mezin bûm
bi firê ketim dîsa . . .
xewn û nîgaşên min fireh bûn,
di pêşbirka azadiyê de me
li bendê me sênc biqete
dîwar hilweşe
hêlîn mezin bibe
Û
bi kewa xwe re
ji roj ,
ba û xwezayê re
bistirînim .
* * * * * * * * *
|
