|
Qedexekirina derketina derveyî
welêt û veguhestina cihê kar: Rêcîma Sûriyê rojnamevan Farûq Hecî
Mistefa û hunermend Enwer "Dijwar" Naso bo helwestên wan ciza dike
Elmanya, 01.11.2005
Di heftiyên dawî de rêcîma Sûriyê careke din rastiya xwe ji raya
giştî re çespand û aşkere kir ku ew qet nikare bîr û baweriyên cuda
qebûl bike.
Piştî ku gelek nivîskar û rojnamevan raserî kiryarên çewisandin û
pinpêkirina mafên bingehîn bûn, vê carê rêcîma Sûriyê bi derxistina
du biryarên ne mirovan e rojnamevan Farûq Hecî Mistefa û hunermend
Enwer "Dijwar" Naso ji xwe re kirin armanc û ew bi sedema çalakbûn û
derbirîna bîr û baweriyên xwe ciza kirin.
Rojnamevan Farûq Hecî Mistefa bi qedexekirina derketina derveyî
Sûriyê hate cizakirin.
Hunermend Enwer "Dijwar" Naso bi veguheztina cihê karê wî ji bajarê
Amûdê bo gundê Sfeya nêzîkî bajarê Hesekê hate cizakirin.
Rojnamevanê kurd Farûq Hecî Mistefa di gelek rojnameyên erebî de
dinvîse û ew bi taybetî jî wekû hevkarekî rojnameya EL MUSTEQBEL ya
libnanî naskiriye. Piraniya nivîsên F. H. Mistefa derbareyî kurdan û
rewşa wan in. Ew di dema dawî de li başûrê Kurdistanê bû û ji wir
gelek nivîs weşandin.
Piştî vegera wî ji başûrê Kurdistanê wî jibo karê xwe ê rojnamegerî
xwest biçe Libnanê. F. H. Mistefa ji ser sînorê Sûriyê-Libnanê hate
vegerandin û derbareyî biryara li dij wî hate agehdarkirin.
Hunermendê kurd Enwer Naso, ku bi navê Dijwar Naso jî tê naskirin,
di nav kurdan de wekû hunermendekî û herweha çalakvanekî siyasî
rexnegir naskiriye. Ew yek ji damezirênerên serekî yên Koma Urkêş ya
hunerî ye, ku di nav kurdan de, nemaze kurdên Sûriye xwedî navekî
xuya ye. Di dema serdaneke hin ji birêvebirên parêzgeha Hesekê bo
bajarê Amûdê, E. Naso pir bi aşkere rewşa bajêr û xelkên wî û
çewisandin û zordariya ku bi taybetî piştî 12. Adara 2004ê li wan tê
kirin, anî zimên. Ev helwesta E. Naso bû sedema gef û çavsoriya ji
hêla rêcîmê ve û di encama vê yekê de cihê karê wî bi zorê hate
veguheztin.
Hevgirtina Rewşenbîrên Kurdên Rojava li Derve (HRKRD) van kiryarên
rêcîma Sûriyê li dijî rojnamevan Farûq Hecî Mistefa û hunermend
Enwer Naso şermezar dike û wan wekû binpêkirina mafê derbirînê
destnîşan dike.
Helwestwergirtina hemberî çewisandin û zordariyê, her dem ji hêla
rêcîmên diktator bi tundî tê cizakirin, rêcîma Sûriyê niha vê
rastiyê careke din diçespîne.
Li gorî karîn û derfetên xwe wê (HRKRD) pirsa çewsandin û
pinpêkirina mafên rewşenbîrên kurd bigihîne dezgehên biyanî ên
têkildar û ew dê bi wan re têbikoşe bo rêcîma Sûriye dest ji van
kiryaran berde.
Komîteya Ragihandinê ya Hevgirtina Rewşenbîrên
Kurdên Rojava li Derve (HRKRD)
|
